Пиши и на МИА!

Почитувани граѓани, почитувачи на ликот и делото на Мајка Тереза,

време е да се запрашаме себеси дали знаеме доволно за она што му се подготвува на градскиот Плоштад во Скопје, а во исто време и се подготвува на Мајка Тереза, најголемата хуманистка на минатиот век.

Оваа предлог-акција се базира на молкот од страна на медиумите кои  до сега не успеаа да ги бомбардираат властите со прашања за кои граѓаните немаат одговор. Дополнително, новинарка од весникот Дневник при коментирање на фејсбук се дрзна да го соопшти следново: “Народот знае за се` досега што требало да се знае околу ова решение”.

Народе,

кој одлучува која е дозата информации која граѓаните треба да ја знаат за нивниот Плоштад? Народе, дали имате доволно информации за она што се подготвува на Плоштад? Народе, дали скромната и несебична Мајка Тереза би била среќна со вакво тајно и магаломанско здание на Плоштадот?

Ако сметате дека граѓаните треба да знаат повеќе и ако сметате дека во моментов не знаете доволно, време е за акција.

01. Свесни сме дека не можеме да влијаеме врз уредничката политика на Дневник и останатите приватни медиуми, врз односот на нивните новинари кон јавноста и кон конкретната проблематика;

02. Затоа, ќе се обратиме до државната информативна агенција МИА, која постои заради граѓаните, а работи со парите на граѓаните;

03. Пишете и на МИА!

————————————————————————————————

Предлог-порака до МИА:

Subject: Барам МИА да дознае повеќе за споменикот на Мајката Тереза на Плоштад!

To: mia@mia.mk, direktor@mia.mk, reporteri@mia.mk

Почитувани,

Ви пишувам заради мојата загриженост во врска со ниското ниво на информираност за изградбата на споменичен објект на Мајка Тереза на Плоштад Македонија во Скопје.

Од вас, како државна информативна агенција која работи за интересите на граѓаните и се финансисра од државниот буџет (од парите на граѓаните) барам до соодветните институции да ги поставите следниве прашања и да инсистирате на одговор:

- Од каде доаѓа потребата за споменично чествување на Мајка Тереза, во време кога за нејзиниот лик и дело во центарот на Скопје веќе постојат споменик и спомен – куќа?

- Кој и врз основа на каква анализа одлучи дека на Плоштадот во Скопје треба да се гради 30-метарски објект во чест на Мајка Тереза?

- Дали беше распишан јавен повик за инвеститор, автор и изведувач на објектот кој ќе се гради во чест на Мајка Тереза?

- Дали ваквото мегаломанско славење на Мајка Тереза не се коси со нејзините дела кои се карактеризираа со скромност, отчетност и чесност?

- Дали власта не требаше да му предложи на инвеститорот да ги вложи своите средства во помош на сиромашните, онака како што Мајка Тереза би инсистирала во ваков случај?

- Колку чини инвестицијата за изградба на новиот споменичен објект за Мајка Тереза?

- Кое е идејното решение за објектот и на каков начин ќе се избере доколку сеуште не е познато? 

Со надеж дека вашите новинарски вештини и техники ќе извлечат повеќе информации на оваа тема, инсистирам на ваша одговорност во името на граѓаните на Република Македонија.

Со почит,

Име и презиме

Почитувани одговорни и совесни граѓани,

Ова е повик за граѓанска акција која треба да е одговор на последниот обид на државната информативна агенција МИА да ја манипулира јавноста, преку извртување на вистината и преку погрешно толкување на изјави од високи дипломати.

На овој блог ќе се објавуваат сите вакви и слични случаи на откриена манипулација од страна на државните јавни гласила.

Последниот скандал е производ на дописникот на МИА од Брисел, Бобан Нонковиќ, кој изјавата на заменик помошникот на државниот секретар на САД, поранешниот Амбасадор на САД во Македонија, Филип Рикер, се обиде да ја спинува и да и даде целосно погрешно толкување.

Имено, новинарот ја искористи изјавата на Рикер во која тој вели “САД се малку разочарани од некои политички лидери кои со своето однесување го пренасочуваат фокусот на вниманието во своите земји од важни работи, а за свои лични програми” и преку државната МИА ја изврте давајќи и значење за кое подоцна се покажа дека не е точно. МИА објави: “Оваа изјава може да се толкува како нова порака за претседателот на опозициската СДСМ, Бранко Црвенковски и неговото улично делување во Македонија.“

После ова, порталот Либертас контактираше со Амбасадорот за да ја провери вистинитоста на ова толкување, а Рикер недвосмислено одговори “Не мислев на господинот Црвенковски. Не се сеќавам дека некој од МИА или било кој македонски новинар присуствуваше на брифингот во Брисел. Алудирав на балканските лидери кои не ги придвижуваат своите земји напред”.

Затоа, сметаме дека МИА треба да се соочи со граѓанска реакција и со јавност, истата онаа јавност со чии пари оваа државна информативна агенција би требало да информира точно, непристрасно и во интерес на граѓаните.

Ги повикуваме сите граѓани кои ги поддржуваат принципите на објективно информирање и независно новинарство да испратат е-порака до одговорните во МИА со која бараме:

01)   Признавање на манипулацијата која е производ на дописникот на МИА од Брисел;

02)   Преземање одговорност во име на дописникот и во име на агенцијата;

03)   Санкционирање на одговорните за ова грубо крешење на слободното информирање и овој обид за манипулирање на граѓаните;

04)   Професионализација на оваа државна институција која се финансира од државен буџет, односно од парите на граѓаните;

05)   Запирање со пласирањето лаги во јавност и објективно информирање во интерес на вистината;

Веруваме дека ваква акција може да биде чекор кон отрезнување на институциите и медиумите кои мислат дека може да си поигруваат со вистината која граѓаните почнаа лесно да ја препознаваат.

Оваа акција нема за цел да брани интереси на ни една партиска опција во Македонија. Оваа акција е директна поддршка на слободата и правото на непристрасно информирање. Последниот настан со Амбасадорот Рикер се користи само како повод за МИА да добие порака од јавноста дека е крајно време да престанат извртувањата на вистината.

Ова се адресите на кои може да испратите е-порака со конкретните барања до МИА:

Љупчо Јакимоски, директор на МИА

direktor@mia.mk

Бошко Трпески, претседател на Надзорен одбор на МИА

bosko.trpeski@mia.mk

Официјална адреса за е-пошта на МИА:

mia@mia.mk

—————————————————————————————————————— 

Заради олесување на чекорите во оваа акција, Ви предлагаме порака која може да ја ископирате и да ја испратите до одговорните од МИА:

Subject: Барам одговорност и санкции за манипулацијата со изјавата на Амбасадорот Филип Рикер

To: mia@mia.mk, direktor@mia.mk, bosko.trpeski@mia.mk

Почитувани,

Ви се обраќам со ова писмо со цел да реагирам на последниот обид за манипулација со јавноста од страна на Вашата институција. Реагирам на лажната информација на дописникот на МИА од Брисел, Бобан Нонковиќ, кој изјавата на заменик помошникот на државниот секретар на САД, поранешниот Амбасадор на САД во Македонија, Филип Рикер, се обиде да ја спинува и да и даде целосно погрешно толкување.

Вашиот дописник и Вашата агенција пренесоа дека оваа изјава може да се толкува како нова порака за претседателот на опозициската СДСМ, Бранко Црвенковски и неговото улично делување во Македонија, а одговорот на Амбасадорот Рикер е јасен: “Не мислев на господинот Црвенковски. Не се сеќавам дека некој од МИА или било кој македонски новинар присуствуваше на брифингот во Брисел. Алудирав на балканските лидери кои не ги придвижуваат своите земји напред”.

Оваа реакција нема за цел да брани интереси на ни една партиска опција во Македонија. Оваа реакција е директно барање за непристрасно информирање.

Затоа, од Вашата информативна агенција која се финансира и со моите пари недвосмислено барам:

01)   Јавно признавање на манипулацијата која е производ на дописникот на МИА од Брисел;

02)   Преземање одговорност во име на дописникот и во име на агенцијата;

03)   Санкционирање на одговорните за ова грубо крешење на слободното информирање и овој обид за манипулирање со граѓаните;

04)   Професионализација на оваа државна институција која се финансира од државен буџет, односно од парите на граѓаните;

05)   Запирање со пласирањето лаги во јавност и објективно информирање во интерес на вистината;

Со почит,

Име и презиме